kisah PALUI tacabur kalicak

SUDAH samingguan ini, Palui Pina manggarunum haja gawiannya.

Kada tahu baisukan, siang wan malam, pina kada baampihan manggarunum.

Dimapa kada kaya itu kalakuan, jalan di kampungnya nang sudah rusak lima tahun hanyar tiga bulan dibaiki tarnyata rusak pulang.

Kada sawat saumur jagung.
Sabujurannya, Palui tu kada tapi sarik banar wan jalan nang satumat rusak tadi.

Tapi sariknya Palui lantaran inya kada kawa baagak, imbah manukar sapida mutur hanyar.
Bila imbah dibasuh hari ini, isuknya licak pulang. Apalagi bila hujan turun sing labatan, pacang tatukup saawakan tupang. Biar platnya balum dipasang, tatap ai urang kada parcaya sapida mutur Palui tu hanyar. Nangkaya apa handak bakoyo ujarnya.

Rupanya Palui sudah kasasarikan, inya mulai bamamai-mamai sambil manyumpah-nyumpah.

Mulai pamburung jalan, supir mutur truk sampai pajabat PU jadi sasaran sumpahannya.

“Ni pasti gara-gara pamburungnya manggawiakan jalan kada sampuraka, handak mambil hujung ganal haja.

Pasti, bubuhan PU mamutung duit paruyiknya.

Gara-gara truk karancakan masuk, pas ai jalannya kaya ini,” ujar Palui Bamamai sapanjang jalan sambil mairit sapida muturnya.

Pas Malihat baju Palui hibak lawan licak sambil mairit sapida mutur, Garbus wan Tulamak nang tatamu di jalan manyapa ai.

“Kanapa Lui baju ikam hibak wan licak,” ujar Tulamak manakuni.


“Ikam umpat ulahraga muturkrus kah?” ujar Garbus Manyahut jua.

“Ini nah, gara-gara jalanan rusak, aku tadi tajungkaling di lubang nang hibak lumpur.

padahal, aku gimit haja basapida mutur,” ujar Palui sambil mangibah tangan bajunya.

“Bujur haja gimit, tapi mata malihat ka babinian, balalu kada taitihi ai lagi jalan” ujar Garbus manyahuti.

“Bujur, Bus ai, aku yakin banar, pas maliwati lubang nang ganal tadi, Aluh Kenjot pas ada bajalan disana,” ujar Tulamak mambujurakan Garbus.

“Ikam jangan manyalahakan jalan nang rusak Lui ai. Aku wani bataruh, pasti gara-gara talihati burit Aluh Kenjot nang ganal itu, lalu ikam kada taitihi jalan lagi,” ujar Garbus.

“Jangankan lubang, tihang listrik gin dirampaknya,” ujar Tulamak manambahiakan sambil tatawa mangalikik.

“Bubuhan ikam ni kaya pananahunya ha lagi, Aku tadi tu bujuran tagulingsir,” ujar Palui baalasan.

“Tapi, gara-gara talihati Aluh Kenjot kalu tagulingsirnya,” ujar Garbus manyahuti.

“Dasar jua bubuhan ikam ni, kadanya manulungi, malahan manyambati tarus,” ujar Palui bajauh kakalahan.

muntungnya tatap haja kada baampihan manyumpahi buhan PU, pamburung jalan wan buhan supir mutur truk.

SEKIAN dulu untuk episode kali ini
Bersambung...

KAPALA SAKULAH KAKALAHAN

Kisah ngini jagan diumpati kawalan lah..??
Ni admin handak mahibur haja..
Sakali lagi admin ingat akan ''JANGAN DITURUTI''
Palui ni tarkanal urangnya raja pandir, pukuknya lamun babahasan lawan palui nih pasti kalah. Siapa haja urangnya pasti dah kalah.
Jadi pas palui talambat sakulah, kapala sakulahnya baniat handak manyariki palui.
Nang ngaran palui nih rajanya babahasan, jadi palui nih ada2 haja nang disambatnya..
Guru : kamana haja ikam lui jadi hanyar haja datang..??
Palui : kanapa pa..?? Pian kangen kah lawan ulun.. Hehe
Guru : napa ikam nih lui...?? Ikam nih talambat sadar kada..??
Palui : sadar ai pa ai, ulun sengaja talambat..
Guru : haratnya ikam lui, sampai talambat ikam sengaja akan.
palui : ulun handak tahu nang kaya apa rispun pian mun ulun talambat, sakalinya pian abut mancari ulun. Bararti pian kangen lawan ulun. Hehe
Guru : kangen napanya, bapa nih lagi sarik lawan ikam.
Palui : sarik kah kangen pa..??
Ayooo ngaku..??
Guru : umma lah ikam neh..!!!
Palui : jujur aj pa lawan ulun, kada usah supan2.
Guru : karuangan bapa wayah ini jua...!!!
Palui : aaayyyy mambawai karuangan bapa, handak mamagut ulun karna kagen kah pian pa...?? Aaayyyyyyy.
Bapa : Bapa nih lagi bujuran sarik lawan ikam..!!!
Palui : mun sarik baapa pian mambawa ulun karuangan pian..?? Ada hadiah nih gesan ulun..???? Heehee
Bapa : kada jadi karuangan bapa, kita karumah ikam ja langsung.. Bapa handak manamui kuitan ikam.
Palui : nah..?? Handak malamar ulun kah pian pa..?? Ulun lakian pa ai, lain babinian.
Bapa : jangan maulu-ulu lui, bapa lagi sarius.
Palui : cuba pang bapa lihat muha ulun nih.. Ulun gin sarius pa ai (muha kisah imut)
Bapa : aduhhhhhhhhhhh.. Kada jadi ka rumah ikam, kita ka kantur pulisi haja sudah..
Palui : piyan handak mambawa ulun di kurung dipanjara supaya piyan kawa malihat ulun satiap saat kah pa..?? Kada kaya itu gin pa ai. Mun kangen sms aja ulun, ulun salalu ada sagan pian ( muha kisah imut)
kapala sakulahnya kada kawa baapa2 lagi, handak ma nampiling palui, kada bulih guru manampiling muridnya. Handak mahukum palui. Ya ada2 haja sasahutannya..
saking pusangnya bapa kapala sakulah nitu manyuruh palui masuk ka kalasnya karna kapusangan malawani palui..
Bapa : sana dah kam, masuk kalas sana..
Mandangar itu palui kadada sahutannya lagi. Palui kada bapikir panjang lagi, inya langsung bukah ka kalas inya..
bapa : awas tuh pang kina bila talambat lagi. Aku baulah cara tu pang supaya kawa mahukum ikam..
dah itu haja..
Sakali lagi jangan dturiti lah, peraturan di sakulahan tuh di patuhi bujur2..
Tunggu kisah sambungannya kaina..

Kisah Sumbahyang Baruku

Salawas umur makin batuha, Palui baubah banar. Sambahyang lima waktu digawinya tarus. Tapi nang ngarannya katuju ka warung tatap kada sing ubahan.
“Rasa lapang hati Mak lah limbah manggawi kawajiban kita,” ujar Palui
“Bujur Lui ai, bahari maka kita pina kuler sambahyang,” sahut Tulamak.
“Itu ngarannya kita dapat hidayah dari Allah,” ujar Garbus manyahuti.

“Dua kali aku sudah mandangar kawal kita ni kaya ustadz, balajar di mana ikam Bus?” Palui hiran.
“Mandangar guru satiap malam Jumahat bayasinan. Cuma aku wayah ini katuju jua mambaca buku agama,” ujar Garbus.
“Amun kaya itu aku handak batakun pang? Aku ni rancak sambahyang kada tapi khusu’, pikiran ka sana ka mari, apalagi limbah malihat babinian, bisa taingat inya wayah sambahyang,” ujar Tulamak
“Ikam kada sah Mak ai, amun sambahyang kaya itu,” ujar Palui tatawa.
“Amun handak khusu’ cuba balajar babacaan lawan tarjamaahnnya, jadi kita tahu maksud dari bacaan nang kita baca,” ujar Garbus manjawab.
“Amun kita ngalih mahapal artinya pang?” ujar Palui.
“Cuba pikiran bulikan bahwa kita mahadap ALLAH, makanya bila sambahyang kita disuruh mata manuju ujung sajadah,” ujar Garbus.
“Kaena ku cubai,” ujar Tulamak.
“Aku bulihlah batakun Bus,” ujar Palui.
“Amun kawa ku jawab, ku jawab…amun kada kawa, baarti ilmuku balum sampai,” ujar Garbus.
“Kalu sambahyang kada baruku kaya apa,” ujarnya.
“Kada sah Lui ai sambahyang kita,” ujar Garbus.
“Tapi rancak Julak Ijul, Abah Rahmat tamasuk Tuhirang sambahyang kada baruku”, ujar Palui.
“Di mana haja Lui ai, amun sambahyang tatinggal rukunya kada sah,” ujar Garbus.
“Aku kada batakun ruku sambahyang, tapi batakun tatinggal ruku. Malah ujar Julak Ijul sambahyang tatinggal ruku tu harat. Sualnya, sambahyang kada bulih sambil maisap ruku,” ujar Palui mangalahakan garbus.

Sabalah-sabalah

BAISUKAN itu wayah Palui wan Garbus handak tulakan ka pasar, bakakajutan acil Irus mangiyau, manyuruhakan basinggah.
“Bus… ui Garbus, ini nah ada apam hanyar datang,” ujar acil Irus mangiyau. “Masih panaslah apamnya?” ujar Garbus.
“Kalu nang ngarannya apam Bus ai, biarpun lawas rasanya hangat jua,” ujar Palui umpat manyahut.
“Apam nang mana Lui?” ujar Garbus.
“Apam acil itu pang,” ujar Palui.
“Jangan manyindir Lui, ikam itu wani manyambat haja imbah kusadiakan kada baliur,” sahut acil Irus marasa disindir Palui.
“Aku bagaya haja cil ai, sahibar manyambat,” ujar Palui.
“Ayu Lui lakasi duduk nginumankah, makanankah, kaina aku nang mambayarinya,” ujar Garbus.
“Aku nginum haja Bus ai, karna aku sudah bajanji wan biniku bahwa aku makan di rumah haja,” ujar Palui.
“Palui ini urang satia wan bini kada hakum makan di luar, pasti iwaknya nyaman-nyaman,” ujar acil mambalas manyindir.
“Kalu sual makanan atawa sual iwak di rumah, aku kada bapilih Bus ai, pukuknya nyaman tarus,” sahut Palui.
“Kada usah ba-agak, kada usah sumbung Lui ai sual iwak,” ujar Garbus.
“Napa iwaknya Lui?” ujar acil Irus.
“Aku kada cakah dan kada sumbung cil ai. Cuntuhnya, samalam sabalah nukar hayam,” ujar Palui.
“Dasar nyaman pamakan ikam Lui ai, kalu sampai sabalahan manukar hayam,” ujar Garbus mamuji.
“Saban harilah kaya itu Lui?” ujar acil Irus. “Alhamdulillah, samalamnya sabalah pulang,” ujar Palui.
“Razaki manusia kada sama, ikam Lui ai tamasuk urang bauntung, saban hari manukar hayam sabalah-sabalah,” ujar Garbus.
“Kaya itu jua Bus ai, baisukan tadi sabalah pulang nukar hayam,” ujar Palui.
“Kalu kaya itu pantas haja Palui kada hakun lagi makan di warungku. Aku manyasal Lui ai kanapa maka dahulu aku kada hakun dijuduhakan wan ikam. Sakalinya hidup ikam nyaman banar hari-hari makan hayam tarus,” ujar acil Irus.
“Sual hayam ini cil ai, aku nang paling katuju mancium bau sambal dan bau bumbu-bumbu kuahnya haja cil ai,” ujar Palui.
“Hau kanapa maka ikam cuma katuju mancium bumbu-bumbunya haja?” ujar acil Irus.
“Itulah … samalam sabalah nukar hayam, samalamnya sabalah pulang manukar hayam dan baisukan tadi sabalah pulang nukar hayam.
Aku cuma mancium bau bumbu sambalnya haja, kada tamakan daging hayamnya,” ujar Palui.
“Kanapa maka kada tamakan dagingnya Lui?” ujar Garbus.
“Samalam urang sabalah kanan rumahku nang manukar hayam, samalamnya tatangga nang sabalah kiwa manukar dan baisukan tadi urang sabalahnya lagi. Artinya, urang sabalah-manyabalah rumah nang manukar hayam, kada biniku. Makanya kami hanya kabagian kaciuman baunya haja,” ujar Palui mambuka rahasia.

Lumba Manyalam

Waktu Ulang Tahun Banjar Ada Nang Namanya Lumba Manyalam Musuhnya Buhan Amerika,Malaysia,Lawn China Sadangkan Indonesia Menjadi Tuan Rumah 

Amerika Di Wakili : Jhonson

Malaysia Di Wakili : Mail

China Di Wakili : Lim Fux

Indonesia Di Wakili :Palui

Limbah Tu Jhonson di Suruh Manyalam Kada Lawas Sakitar 30 Manit Kaluar Si Jhonson Dari Banyu Limbah Tu Si Mail Pulang Di Suruh Manyalam Bilang Lawas Urang Mahadangi Si Mail Kaluar Sakalinya Kaluar Jua Si Mail Nih Sakitar sajam satangah habis tuh si Lim Fux Pulang Di Suruh Manyalam Bilang Handak Taguring Urang Mahadangi Inya Kaluar Sakali nya Kaluar Jua Manusia Saikung tuh Sakitar dua jam lima balas manit ujar palui harat jua amalan kawn seekong nih giliran si palui pulang palui kada alang alang bacabur dari atas jambatan bilang sampai urg handak bulikkan mhdgi si palui ja seharian semalaman mahadangi palui sakali nya pas banyu surut kalihatan si palui ujar si juri lawas nya ikm lui banyalam 

ujar palui

PALIR UNDA TAGAPIT BUNGUL AI

Kisah Saraba Labih

Salawas badiam di Banjar ini sudah lima anam kali Palui wan bininya bapindah rumah. Alasannya karna bini Palui cemburu laki itu rancak manyirit bini tetangga nang langkar?

Lalu imbah pindah rumah timbul pulang cemburunya karna laki rancak disirit dan dirayu bini tetangga. Mau kada mau bini Palui marunca-runca minta bawai bapindah pulang.

“Batatangga itu memang saraba ngalih Bus ai, apalagi batatangga wan urang sugih, urang langkar, urang bapangkat. Sabujurnya cintaku wan Palui itu sudah kadada lagi,” ujar bini Palui mangakui.

“Kalu sudah kadada lagi cintanya wan Palui kanapa maka ikam sampai wayah ini pina makin rikit banar kada ubahnya kaya kukang haja,” ujar Tulamak.

“Cintaku memang sudah kadada lagi wan lakiku Palui itu karna sudah baubah manjadi kasih sayang. Kasih sayang itu labih tinggi nilainya dari cinta monyet,” ujar bini Palui babahasa ABG.

“Aku himung banar mandangar panderan ikam ini bini Palui ai. Kada rugi Palui bahujan bapanas siang malam mahaluki ikam wayah bujangan dahulu karna cintanya adalah cinta karas. Kasih sayang ikam badua itu ibarat paribahasa ‘bila cinta sudah melekat maka tahi gigi barasa suklat’,” ujar Garbus mambalas bahasa ABG nang diucapakan bini Palui.

“Aku umpat batakunlah bini Palui dan jawab sabujurnya, napa alasannya maka tahi gigi itu barasa suklat itu?” ujar Tulamak.

“Ampun maaflah, karna bubuhan ikam sudah lawas tahu dan sudah lawas patuh wan lakiku Palui pasti sudah tahu kalabihannya,” ujar bini Palui.

“Ampun maaflah jua, kami sudah tahu kalabihnnya yaitu muhanya pina baracak bakas kacacaran, balukuknya batukul kaya urang mambawa parang, jariji tangan kirinya labih sabuting,” ujar Tulamak.

“Muha baracak itulah nang maulah nyaman bagisang bila wayah bacium, tukul di balukuk itu gasan baingkut wayah baragap dan jari labih manyamani bila bagaru,” ujar bini Palui kada hakun kalah.

“Ooo… jadi kalabihan itu ada manfaatnyalah bini Palui?” ujar Garbus.

“Ada lagi kalabihan lainnya nang kada kalihatan tapi hanya bisa dirasakan,” ujar bini Palui.

“Napa itu bini Palui?” ujar Garbus.

“Lakiku itu ada baisian tiga bigi butir di kapalanya nang aduhaiii… bila dipakai,” ujar bini Palui pina bakirikkirik galianan.

Kisah Si Palui Betatanguhan Karak

SI TULAMAK dasar kada kawa mandangar ada makanan pina hanyar,langsung inya handak marasani. Tapi karna kada tapi panduitan makanya inya cuma kawa managuk liur haja.
“Wayah ini ujar habar ada wadai matan Betawi nang bangaran karak hintalu alias karak telur,bujurlah Bus?” ujar Tulamak.
“Kanapa maka ikam tapikir wadai karak hintalu itu Mak?” ujar Garbus.
“Aku hanyar mandangar makanya aku handak tahu lawan handak marasani kaya
apa rasanya,” ujar
Tulamak.
“Ikam ini dasar jago makan Mak ai. Samalam handak marasani pisang epek wan coto mangkasara, wayah ini handak karak telur Jakarta, padahal
sabalumnya handak marasani rujak cengor wan
gudeg Jogya,” ujar Garbus.
“Tapi samacam nang ikam kada wani mamakan.”
“Samunyaan makanan khas daerah kuhantup. Makanan napa itu Bus nang ikam
padahakan aku kada wani?” ujar Tulamak manantang.
“Ikam pasti kada wani mamakan wadai empek-empek Palembang,” ujar
Garbus.
“Hi-ih lah, aku kada wani mamakan empek-empek karna karas banar wan layat di-igut, apalagi mamakannya bacampur cuka. Apalagi gigiku banyak rusak dan sudah parak kilum,” ujar Tulamak mangaku.
“Napa pina rami mamander wadai wan makanan. Cuba tangguh wadai karak napa
nang rasanya masin-masin tapi kada bauyah,” ujar Palui.
“Gampang Lui ai, karak nang masin-masin itu adalah karak iwak rabuk,”
ujar Garbus.
“Karak iwak rabuk itu bujur haja masin tapi masinnya karna diuyahi,” ujar Palui.
“Karak dodol hangit,” ujar
Tulamak.
“Karak dodol rasanya manis Mak ai,” ujar Palui
“Kukira samunyaan karak
nang masin itu adalah pasti karna bauyah, karna kabanyakan uyah lalu rasanya masin,” ujar
Tulamak.
“Ada Mak ai, rasanya masin
justru karna kada
bauyah,” ujar Palui
mayakinakan.
“Kalu kaya itu karak napa
Lui? ujar Garbus.
“Nang kada bauyah tapi pasti masin adalah karak…
karak hidung. Kalu bubuhan ikam kada parcaya cuba rasani sadikit,” ujar Palui
tatawa.
“Hussss…. jijik lawan rigat kada biasa tarasani,” sahut Tulamak pina bakirik.