Kisah Palui (Facebook Fanspage) (Babau Ruku)

BINI Palui tamasuk urang nang parhatian lawan anak, salawas baanakan ha lus inya bujur-bujur maurus kaparluan aluh anaknya itu. Saban minggu Inya manimbang barat nang anak di posyandu.
“Banaik haja kah timbangan anak kita? ujar palui manakuni bininya Julaiha nang datang matan posyandu.
“Naik kai abahnya ai, parak sakilo naiknya : ujar nang bini mamadahi “Itu barakat ikam baik maharagu anak,” ujar Palui mamuji bininya.

Palui Babau Ruku

“Ulun maumpati papadahan buhan bidan abahnya ai, mamakai ASI ,” ujar bininya baungah.“Kalu inya masuk angin amun di bari ASI tarus?” ujar Palui bagaya.
“ASI tu abahnya ai Air Susu Ibu, kadanya AC nang pandingin itu pang,” ujar nang bini mangibit. “Sabujurnya ASI tu mambantu jua ka kita, maringanakan kita kada manukar susu babalik,” ujar Palui lalu mamaraki ka anaknya nang bakakajutan manangis.
“Hau, kanapa awaknya panas?” ujar Palui takajut imbah manggendong.
“Limbah diimunasi itu dasar panas abahnya ai, kena ampiahai inya,” ujar nang bini. Rupanya awak anak Palui panas liwar. Aluh manangis nyaring banar, sampai kadangaran ka rumah sabalah.
“Kanapa umanya,” ujar Palui bingung mandangar anaknya tambah nyaring manangis. “Susui pang umanya!”
Tapi nang anak malah magin nyaring manangis, kada hakun manyusu.
Kada biasanya inya kaya itu, kada mau manyusu. Bingung bini Palui malihat kalakuan anaknya itu.
“Kanapa nak jadi kada mau manyusu? ujar bini Palui kahabisan akal mambisai anaknya.“Kalu banyu susu ikam nang masam umanya?” ujar Palui manakuni nang bini.
Bini Palui lalu marasai lawan mancium-cium ka banyu susunya. Lawas inya marasakan, hanyar inya paham kanapa anaknya kada mau manyusu di awak.
“Anu abahnya ai, anak kita kada hakun manyusu ka awak ulun karena susunya babau,” ujar nang bini.“Bujur kalu masam umanya. makanya dijaga bamamakan jadi banyu susu kada masam,” ujar Palui mamadahi.
“Banyu susunya kada masam abahnya ai, tapi susunya babau,” sahut bininya. “Babau napa?” ujar Palui kada paham.
“Babau ruku sampian, bakas malam tadi kalu,” ujar nang bini langsung babasuh.